அகில இந்திய ஹாக்கி: பெங்களூர் ஹாக்கி அசோஸியேஷன் அணி சாம்பியன்
கோவில்பட்டி, மே 27:
தூத்துக்குடி மாவட்டம், கோவில்பட்டியில் நடைபெற்ற லட்சுமி அம்மாள் நினைவு கோப்பைக்கான அகில இந்திய ஹாக்கிப் போட்டியில் பெங்களூர் ஹாக்கி அசோஸியேஷன் அணி சாம்பியன் பட்டம் வென்றது.
கோவில்பட்டி கே.ஆர். மருத்துவம் மற்றும் கல்வி அறக்கட்டளை சார்பில் கே.ஆர். கல்வி நிறுவனங்கள், லட்சுமி அம்மாள் ஸ்போர்ட்ஸ் அகாதெமியுடன் இணைந்து கோவில்பட்டி கிருஷ்ணா நகரில் உள்ள செயற்கை இழை ஹாக்கி மைதானத்தில் இம்மாதம் 16ஆம் தேதி முதல் அகில இந்திய ஹாக்கிப் போட்டி நடைபெற்று வந்தது.
இப்போட்டியில் 16 அணிகள் பங்கேற்றன. ஞாயிற்றுக்கிழமை நடைபெற்ற இறுதிப்போட்டியில், பெங்களூர் ஹாக்கி அசோஸியேஷன் அணி, செகந்திராபாத் தெற்கு மத்திய ரயில்வே அணியுடன் மோதியது. முதல் பாதி ஆட்டத்தில், 14ஆவது நிமிடத்தில் பெங்களூர் ஹாக்கி அசோஸியேஷன் அணி வீரர் முகமது ரஹீல் மௌசின் ஒரு கோல் அடித்தார். 18ஆவது நிமிடத்தில் அதே அணி வீரர் குஷா ஜெபி கௌடா ஒரு கோல் அடித்தார். 29ஆவது நிமிடத்தில், செகந்திராபாத் அணி வீரர் இன்னோசெண்ட் குல்லு பெனால்டி கார்னர் முறையில் ஒரு கோல் அடித்தார். 33ஆவது நிமிடத்தில் பெங்களூர் அணி வீரர் குஷா ஜெபி கௌடா பெனால்டி கார்னர் முறையில் ஒரு கோல் அடித்தார்.
தொடர்ந்து நடைபெற்ற 2ஆவது பாதி ஆட்டத்தில், 54ஆவது நிமிடத்தில் செகந்திராபாத் அணி வீரர் ரஞ்சன் ஐயப்பா ஒரு கோல் அடித்தார். 58 மற்றும் 60ஆவது நிமிடத்தில் பெங்களூர் அணி வீரர்கள் ஆஞ்சநேயா அம்பிகரா மற்றும் குஷா ஜெபி கௌடா ஆகியோர் தலா ஒரு கோல் அடித்தனர்.
ஆட்ட நேர முடிவில் 5-க்கு 2 என்ற கோல் கணக்கில் பெங்களூர் அணி வெற்றி பெற்று சாம்பியன் பட்டத்தைப் பெற்றது.
முன்னதாக நடைபெற்ற மூன்றாம் மற்றும் நான்காம் பரிசுக்கான போட்டியில் 5க்கு 2 என்ற கோல் கணக்கில், சென்னை ஐ.சி.எப். அணி மும்பை அகில இந்திய கஸ்டம்ஸ் மற்றும் சரக்கு சேவை வரி அணியை வீழ்த்தியது.
பின்னர் நடைபெற்ற பரிசளிப்பு விழாவில், விளாத்திகுளம் சட்டப்பேரவை உறுப்பினர் சின்னப்பன் வெற்றி பெற்ற அணிகளுக்கு ரொக்கப்பரிசு மற்றும் சுழற்கோப்பைகளை வழங்கினார். முதல் பரிசு ரூ.1 லட்சம் மற்றும் லட்சுமி அம்மாள் நினைவு சுழற்கோப்பையை பெங்களூர் ஹாக்கி அசோஸியேஷன் அணியும், 2ஆவது பரிசு ரூ.75 ஆயிரம் மற்றும் சுழற்கோப்பையை செகந்திராபாத் தெற்கு மத்திய ரயில்வே அணியும், 3ஆம் பரிசு ரூ.50 ஆயிரம் மற்றும் சுழற்கோப்பையை சென்னை ஐ.சி.எப். அணியும், 4ஆம் பரிசான ரூ.30 ஆயிரம் மற்றும் சுழற்கோப்பையை மும்பை அகில இந்திய கஸ்டம்ஸ் மற்றும் சரக்கு சேவை வரி அணியும் பெற்றன.